PCR et Justin : Pourquoi pas 35 heures au collège pour les profs ?

Solon moin, akoz pa ?

OTÉ !

KIT à fout koméraz, asèv mèt doluil dési ladilafé-là. Ségolène Royal la koz tro vit. Bann profésèr i dovré rèss trannsink èr dann kolèz, po èd bann zélèv pli fèb. Akoz pa ? Moin nana dalon profésèr. Zot minm i di amoin. Dizuit èr zot i travay, plis inndé z’èr par-là po prépar zot bann kour. Alors, zot i pé rèss parkoté zot zélèv, non, ashèv rir.

N’alé pa dir bann profésèr i travay pa. La pa vré. Soman, kan ou mazine tousa zilétré nana La Rénion, i fo n’i di po vréman, in sha in sha, in shien in shien. Kont aou pli-d 780.000 zilétré. I gingn pa lir oubiensa ékri kréol. Kont aou pli-d 780.000 moun i koné pa tout zot listoir, zot zéografi, zot bann zanimo, zot bann plant, zot bann kont. Oté, zot va dir amoin : "bann rénioné i koné pa rien !". Oté ! la pa amont azot. Rienk zordi la fagot in fason fé rant nout "sivilizasion" dann lékol. Dawar, si banna i rèss trannsink èr dann kolèz, va gingn mèt ankor détroi z’èr po nout kiltir. Vié rèv...

Justin

http://www.temoignages.re/article.p...